أنا هنا يا ماما . . أنا هنا يا بابا
رحتم فين وسيبتوني
صحيت مش شايفاكم بعيوني
أنا بحلم ولا انتم فعلاً هجرتوني
يعني خلاص مش هتلاعبوني
وضفايري مش هاتربطولي
وشعري مين هايلمهولي
وشنطتي وكتبي ويلبسني مريولي
رحتم فين كده وسيبتوني
أهون عليكم كده تنسوني
طب نسيتو يوم ما جبتوني
وعلى الدنيا دي ولدتوني
مش بالعروسه وعدتوني
وبفستاني الأبيض المليان ورد لبستوني
رحتم فين كده وسيبتوني
فين صحابي .. فين لعبي . . فين عروستي اللي عيونها بلون عيوني
ليه مش بتردو عليا . . ليه مش زي الأول بتنادوني
يمكن استغماية بتلاعبوني
يعني خلاص بتبعدوني
ومش على المدرسه هتخدوني
متعيطيش يا ماما . . ما تبكيش يا بابا
أنا شايفاكم مع كتير زيي هنا بيحبوني
بنطير في جنينه كبيره . . شجر أخضر . .
وألوان جميله وزهور وبلونه حمرا بفيونكه كربوني
مش عايزاكم أبداً تنسوني
وافرشوا على قبري ورد ووزعو شكولاته ومصاص و بومبوني
بحبكم بس الملايكه أهم جم خدوني
عند ربنا . . . مستنياكم ترجعولي . . اوعوا تنسوني . . اوعوا تنسوني
ودايماً إفتكروني
